Sezin na Tai hpyen dap lahkawng hpe KIA ni gasat zing

KIA Masat (9) Dap Ba, Masat (26) Dap Dung ginra Nawng Lut Ginwang, Sezin mare mayan kaw dap jung shara jahkrat nga ai Tai hpyen dap shara lahkawng hpe August (8) ya jahpawt manap hkying (1:40)Am aten daram hta KIA hte KPDF pawnghpawm hpyen hpung ni sa htim gap gasat kau ai lam nga ai.

Sezin kaw dap shara jahkrat nga ai Myen hpyen gumshem dap Hk.M.Y (119) hte shanhte a lagaw lata tai ya nga ai Tai Dap shara lahkawng hpe KIA pawnghpawm hpyen hpung ni sa htim gap gasat ai kawn gasat poi laja lana byin wa ai hpang, jahpawt hkying (5:00)Am aten daram hta KIA pawnghpawm hpyen hpung ni Tai hpyen dap shara lahkawng hpe hpya kau ya lu ai sha n-ga hpyen lang arung arai hte sinat machyu pala law law mung padang dip zing la lu ai lam shawng lam shiga kaw na chye lu ai.

Sezin kaw gasat poi byin ai hpang Ginsi kaw dap jung shara jahkrat nga ai Myen hpyen dap ni mung jahpawt hkying (6:00)Am aten daram kaw nna Nam Jan maga de laknak kaba gap bang ai lam ni mung nga ai re hpe na chye lu ai.

KIA Masat (9) Dap Ba ginra hta Myen hpyen gumshem dap ni, shanhte a lagaw lata tai ya nga ai laknak lang uhpung ni laklai ai hku hpyen shamu shamawt chyinglau wa ai sha n-ga hpyen n-gun jat jahting ai lam mung ding yang galaw wa ai majaw lai wa sai July shata laman kaw nna Sezin ginra hta gasat poi ni laja lana byin wa ai re hte gasat poi ni hta Myen hpyen gumshem dap ni gaw Jet fighter Nbungli ni du hkra jai lang nna KIA hpyen hpung ni hpe sa htim gap gasat ai re hpe matut chye lu ai.

Leave a Reply

*

This site uses Akismet to reduce spam. Learn how your comment data is processed.