Hka Garan kaw KIA hte Myen hpyen gumshem dap ni gasat poi byin

KIA Masat (1) Dap Ba, Masat (10) Dap Dung ginra, Hka Garan makau kaw June (12) y jahpawt hkying (6:00) aten Myen hpyen gumshem dap hte KIA hpyen hpung ni gasat poi byin ai lam nga ai.

Hka Garan kaw na shamu shamawt wa ai Myen hpyen gumshem dap ni KIA hpyen hpung nga ai shara maga de chying lau du wa ai majaw KIA hpyen hpung ni hkap shingla gasat dat ai kawn gasat poi byin wa ai re lam chye lu ai.

KIA Masat (10) Dap Dung ginra rai nga ai Za Nan hka mahkrai pawt kaw mung June (10) ya shani Sumpra Bum maga de na yu wa ai Myen hpyen gumshem dap hte P.T.Ts hpawnghpawm hpyen hpung ni KIA ginra de htu shamu shamawt chying shang wa ai majaw KIA hpyen hpung ni hkap shingla gasat dat ai kawn gasat poi byin nna gasat poi hta Myen hpyen gumshem dap hte P.T.Ts hpyenla ni si hkala hkrum lam law ai hpe na chye lu ai.

N-dai bat laman Sumpra Bum lam hte Danai Lido lam mayan hkan Myen hpyen gumshem dap ni hpyen shamu shamawt nga ai majaw KIA hte gasat poi shani shagu ngu na daram byin nga ai re.

June (12) ya jahpawt hkying (7:00) aten daram hta gaw Manmaw maga de na Myen hpyen gumshem dap n-gun (100) grup yin lawm ai lagaw lam hpyen hpung ni malu masha, hpyen lang rung rai ni gun nna Myotit maga de shamu shamawt lung wa ai lam ni mung nga ai hpe matut sagawn chye lu ai.

 

Leave a Reply

*

This site uses Akismet to reduce spam. Learn how your comment data is processed.