KIA Masat (1) Dap Ba, Masat (2) Dap Ba hte Masat (9) Dap Ba ginra shara (3) kaw gasat gala byin

Wunpawng Mungdan Shanglawt Hpyen Dap KIA Masat (1) Dap Ba, Masat (10) Dap Dung ginra, Za Nan hka mahkrai pawt kaw June (10) ya jahpawt hkying (5:15) aten hta Myen hpyen gumshem dap hte KIA hpyen hpung ni gasat poi byin ai lam nga ai.

Su Yang kaw na yu wa ai Myen hpyen gumshem dap ni KIA hpyen hpung ni nga ai ginra de htu shadut shang chying lau wa ai majaw Za Nan hka mahkrai pawt kaw du ai hte KIA hpyen hpung ni hkap shingla gasat ai kawn lahkawng maga gasat poi byin wa ai re lam chye lu ai.

KIA Masat (2) Dap Ba, Masat (43) Dap Nawng Dap Dung ginra Nam Hpyek mare baw kaw mung dai jahpawt hkying (6:40) aten hta Lido lam hku hkan nna shamu shamawt wa ai Myen hpyen gumshem dap Hk.M.Y (390) hte Hk.L.Y (86) pawng hpawm n-gun (100) grup yin lawm ai lagaw lam hpyen hpung hpe KIA hpyen hpung ni bawm hte hkap shingla gasat dat ai lam nga ai.

Bawm hte hkap shingla gasat hkrum ai hpang Myen hpyen gumshem dap hpung ni makau grup yin de laknak kaji kaba gap bang ai lam nga ai hte hkying (9:00) aten kaw nna Ting Kawk hpyen dap Hk.M.Y (382) dap ni hte nam Nam Hpyek hpyen dap Hk.M.Y (390) dap ni kawn lai wa lai sa Modo, Sengke yawng hpe pat hkum da ai lam nga ai hpe matut sagawn chye lu ai.

KIA Masat (9) Dap Ba, Masat (26) Dap Dung ginra, Mai Nawng kaw mung shani (12:15) aten kaw na Myen hpyen gumshem dap Hk.M.Y (111) hte Hk.L.Y (42) pawnghpawm hpyen hpung ni KIA hpyen hpung ni nga ai shara de shamu shamawt shang wa ai majaw KIA hpyen hpung ni hkap shingla gasat nna gasat poi byin nga ai lam chye lu ai.

 

Leave a Reply

*

This site uses Akismet to reduce spam. Learn how your comment data is processed.