World Environment Day hpe masat masa galaw ai hku nna Laiza Muklum Kata Hpun Hkai Lamang Galaw

UN kawn June praw (5) ya shani Mungkan shingra maka hte makau grup yin World Environment Day nhtoi ngu masat da ai hte maren Mungkan Mungdan law law hta mung shagrau masat masa lamang ni, hpun hkai shatut ai lam ni galaw shajang ai rai nna KIO uphkang ginra Laiza Muklum hta mung World Environment day hpe shagrau ai hku nna KIO Asuya Magam Dap/Makan Dap de na Magam gun ni, Shinggyim uhpung uphawng ni, Mung shawa Kanu Kawa ni marai (300) daram shang lawm let June (4) ya shani Mung seng Yang Mare kaw hpun hkai lamang galaw sai re.

Mungkau shingra maka hte makau grup yin hpe tsaw ra makawp maga na matu, UN gaw lai wa sai 1973 June (5) ya shani hta World Environment Day ngu masat shagrin da sai rai nna dai nhtoi hta shaning shagu Mungkan Mungdan law law masat masa lamang ni galaw ai sha n-ga hten za mat ai hpun maling ni hpe hkai shatut ai lam, makau grup yin hpe tsawra makawp maga na matu ningmu jaw hpaji kaw ai lamang mayu myu mung galaw shajang ai re.

Mungkan a gahtet shadang shayawm lu na matu makau grupyin tsit lali ai lam gaw ahkyak madung re, tsit lali ai Hpun Kawa n nga yang Nam hkan na dusat dumyeng ni nga shara n-nga si htum wa mai ai, san seng ai Hkashi hkanu,  san seng ai nbung nsa nga lu na matu gaw shingra makau grup yin ahkyak madung rai nga ai majaw KIO Ginjaw,  Laiza Mulum hta mung shaning shagu hpun hkai shatut ai lamang, hpaji jaw ningmu jahpaw ai lamang ni galaw nga ai rai nna dai ning na Mungkan makau grup yin nhtoi masat hta gaw Namsi, Namsaw, Nampan hte kaga hpun amyu hpan (31) hpe hpun bawng hkying lahkawng jan hkai sharut da la lu sai re.

Dai ning na World Environment Day lashum ga Mungkan langai “Only One Earth” ngu ai ga baw kata World Environment Day lamang hpe galaw ai rai nna June (5) ya shani gaw laban shani ang ai majaw Laiza Muklum kata June (4) ya shani hta galaw ai ai rai nna World Environment Day lamang hpe Mungkan Mungdan (143) hta mung Hpun hkai lamang ni, shingra tara makau grupyin hte seng ai shingjawng lamang ni, hpaji jaw ningmu jahpaw ai lamang amyu myu galaw na masing nga ai re hpe na chye lu ai.

Leave a Reply

*

This site uses Akismet to reduce spam. Learn how your comment data is processed.