KIA Masat (1) Dap Ba ginra hte Masat (6) Dap Ba ginra kaw gasat poi laja lana byin

Wunpawng Mungdan Shanglawt Hpyen Dap KIA Masat (1) Dap Ba Masat (10) Dap Dung Ginra Kawa Pang lahta kaw May (15) ya shani hkying (11:35)aten Myen hpyen gumshem dap hte KIA hpyen hpung ni gasat poi byin ai lam nga ai.

Myen hpyen gumshem dap n gun (50) grup yin lawm ai hpyen hpung ni jahpawt daw hkying (8:00) aten Daru hka maga kawn lagaw lam hku KIA hpyen dap nga ai ginra de shang wa ai majaw Kawa Pang kaw du ai hte KIA hpyen hpung ni hkap shingla gasat ai kawn lahkawng maga gasat poi byin wa ai re hpe chye lu ai.

KIA Masat (6) Dap Ba, Masat (9) Dap Dung ginra, Namhpalun hte Hpa Hkik lapran Hkahtawlik nawku jawng kawng marawn kaw mung May (15) ya shani hkying (11:39) aten Myen hpyen gumshem dap hte KIA hpyen hpung ni gasat poi byin ai lam nga ai.

Dai jahpawt hta sha Myen hpyen gumshem dap Tatma (44, 66, 77,99) pawnghpawm hpyen n-gun (80) grup yin lawm ai hpung ni gaw Namhpalun kawn yu wa nna KIA hpyen hpung ni shara nga ai ginra mayan de shang chying lau wa ai majaw KIA hpyen hpung ni hkap shing la gasat ai kawn shana de hkying (1:30) aten du hkra numdaw lahkawng lang gasat poi laja lana byin ai lam chye lu ai.

Gasat poi byin ai hta Myen hpyen gumshem dap maga na si hkala hkrum ai lam law nna, dai hpyen hpung ni gaw ya aten du hkra gasat poi byin ai shara hkan dap jung shara la nga ai majaw gasat poi naw byin wa mai ai lam shawng lam lit nga salang ni maram da ai.

Myen hpyen gumshem dap ni gaw lai wa sai ten hkan mung dai ginra mayan hkan ding yang shamu shamawt nga ai ni re hpe matut sagawn chye lu ai.

 

Leave a Reply

*

This site uses Akismet to reduce spam. Learn how your comment data is processed.