Kamaing kaw hkawm sa hkawm wa mungmare masha ni hpe sawk jep

Kamaing Byuha kawng kaw dung ai Myen hpyen gumshem dap hte P.T.Ts pawnghpawm hpung ni May.(10) ya jahpawt hkying (7:00) aten kaw na mare ka-ang lam mazup kaw lai sa lai wa mungmare masha ni hpe laja lana sawk jep ai lam chye lu ai.

Dai Myen hpyen gumshem dap pawnghpawm hpung ni gaw n-gun (20) grup yin hte mare ka-ang kaw sawk jep ai rai nna hpa majaw ya na zawn lai wa lai sa mungmare masha ni hpe sawk jep ai lam tup hkrak n chye lu ai hte jahpawt hkying (8:00) kaw shanhte a shara de bai nhtang wa mat ai nga nna ginra masha ni tsun ai.

Dai hpang hkying (11:00) aten hta Kamaing Byuha Mu Aung Naing Win ngu ai wa gaw mare uphkang salang ni hte mare kanu kawa nkau hpe Byuha kawng de shaga la nna mare shimlum lam a matu mare kata shamu shamawt ai lam galaw na hte mare kanu kawa ni garum ya lawm na lam, mare kata kyu hpyi hpawng ni nga yang jau tau nna shiga shana ya na lam tsun wa ai re hpe mung chye lu ai.

Kamaing Byuha Mu Aung Naing Win gaw May (9) ya shani mung mare uphkang salang ni hte mare kanu kawa nkau hpe Myo uphkang rung kaw shaga mahkawng la nna mare kata shana hkying (9:00) ten kawn jahpawt daw hkying (4:00) aten laman pru prang hkawm ai lam n galaw na, mare kata masha marai (5) a lahta dung chyawm shaga ai lam tsep kawp n galaw na hte matsun aming n hkan yang gap sat na nga nna matsun da ai lam nga ai hpe mung chye lu ai.

 

Leave a Reply

*

This site uses Akismet to reduce spam. Learn how your comment data is processed.