Jak sau manu laja nga ai majaw hkauna galaw sha ai ni yakhkak hkrum nga

Jak sau manu ni grau rawt wa ai majaw, jak hte hkauna galaw sha ai mungmare masha ni yakhkak dut dang hkrum nga ai lam na chye lu ai.

Lido lam mayan na Yuzana Pa hte Nam Ya pa kaw hkau na galaw sha nga ai mungmare masha ni jak sau manu rawt ai hta hkauna galau manu ni shawoi shaning na hta grau laja wa ai majaw yakhkak nga ai lam hkauna galaw sha nga ai mungmasha ni kaw na chye lu ai.

Lai wa sai shaning hkan gaw hkauna galau manu Eka mi hta Myen gumhpraw (20,000) hte (25,000) lapran nga ai raitim dai ning gaw sau manu rawt ai hta hkan nna (35,000 – 40,000) lapran du nga ai hpe chye lu ai.

Ya na zawn sau manu rawt nna hkauna galau manu ni grai laja nga ai majaw hkauna Eka law law galaw ai ni a matu arang grau kaba bang ra wa ai re hte n kau gaw hkauna galau manu laja nna hkauna pi n lu galau ai lam, Lido lam mayan de hkauna galaw sha ai nga ai salang langai tsun ai.

Lido lam mayan na hkauna ni hta lai wa sai shaning hkan hka galup ai lam, mam hpun hkraw si nna mam pru shadang yawm ai lam ni mung byin lai wa sai re, hkauna hpe madung kanbau bungli hku galaw sha ai ni gaw hkauna kaw arang kaba bang ai raitim dai ning mung shing ra hpyen a majaw mam pru shadang bai yawm mat na hpe myit tsang nga ai re.

Leave a Reply

*

This site uses Akismet to reduce spam. Learn how your comment data is processed.