Chaung Wa P.T.Ts dap hpe KIA pawnghpawm hpung ni sa htim gasat nna dap wan nat kau ya

Wunpawng Mungdan Shanglawt Hpyen Dap KIA Masat (9) Dap Ba, Masat (26) Dap Dung ginra, Chaung Wa P.T.Ts dap hpe April (28) ya jahpawt hkying (4:10) aten KIA pawnghpawm hpyen hpung ni sa htim gap gasat ai lam nga ai.

Myen hpyen gumshem dap a lagaw lata tai nna dap jung shara jahkrat nga ai P.T.Ts dap hpe KIA hte KPDF pawnghpawm hpyen hpung ni laknak kaba ni hte wa htim gap gasat ai lam rai nna shanhte a dap hpe wan nat jahten kau lu ai lam shawng lam shiga kaw na chye lu ai.

Gasat gala byin ai majaw jahpawt hkying (5:30) aten kawn Ginsi Byuha kawng kaw dung ai Myen hpyen gumshem dap ni hte Tanggau bum post na Myen hpyen gumshem dap ni gaw Anang Camp maga de (105) MM ngu maram lu ai laknak kaba si (6) langa gap bang ai lam nga ai hpe mung na chye lu ai.

Laknak kaba hte htim gasat hkrum ai ten Chyaung Wa P.T.Ts ni hprawng koi yen ma ai rai nna ya aten Lung Tung P.T.Ts dap de yen shang mat sai lam mung matut na chye lu ai.

Myen hpyen gumshem dap kawn mungdan asuya daru magam ahkang aya zing madu la kau ai hpang Balik dap hte P.T.Ts ni gaw Myen hpyen gumshem dap a lagaw lata tai nna bungli galaw ya wa ai majaw gumshem Balik dap hte P.T.Ts dap ni gasat hkrum ai lam jahkring hkring byin wa ai re.

 

Leave a Reply

*

This site uses Akismet to reduce spam. Learn how your comment data is processed.