Kachin Anti Drug Day hta Ka-ni nanghpam wan nat jahten

KIA Masat (9) Dap Ba, Uru ginwang ginjaw, Lawt Ra dabang hte Masat (6) Dap Dung, Bum Nan dabang kaw April (25) ya shani lu rim da ai Ka-ni nanghpam hte rung rai ni hpe wan nat jahten ai lam nga ai.

Wunpawng Amyu Sha Ka-ni nanghpam pat jasan ninghkap masat nhtoi hpe masat masa galaw ai hku nna Lawt Ra dabang kaw laning mi laman lu rim zing da lu ai Ka-ni hpraw kawk (397), Ya Ma tawng (26,078), Ka-ni Chyang Joi (13), Yan Hpau htuk kasha (3), Pan Lap htuk kaba langai hte kaga ka-ni nanghpam rung rai ni hpe nat jahten kau ai lam nga ai sha n-ga Bum Nan kaw mung Kani Hpraw kawk (24), bu (67), Ya Ma tawng (30,000) hte ka-ni nanghpam lang rung rai ni hpe nat jahten kau ai lam nga sai re.

Dai ni ang ai Wunpawng Amyu Sha Ka-ni nanghpam pat jasan ninghkap masat nhtoi shani hta buga mare kahtawng hkan, Dap Ba, Dap Dung hkan mung Ka-ni nanghpam hte seng nna hpaji jaw hkaw tsun hpawng ni, akyu hpyi hpawng ni galaw ai lam nga ai hpe mung chye lu ai.

Ka-ni nanghpam pat jasan masing jum hpajang Komiti kawn mung mungdan ting na ginra pat jasan komiti hte buga pat jasan komiti ni yawng de Ka-ni nanghpam pat jasan ai magam bungli bai galaw sa wa na matu April (25) ya shani n-dau laika langai shapraw da ai lam nga sai re.

Leave a Reply

*

This site uses Akismet to reduce spam. Learn how your comment data is processed.