Myen hpyen gumshem dap ni mare makau grup yin hkan laknak kaba gap shadam

Mogaung ginra, Sarmaw, Kanyin Myai kaw dap jung nga ai Myen hpyen gumshem dap Hk.M.Y (383,384) dap ni gaw mare makau grup yin hkan laknak gap shadam ai lam ding yang galaw nga ai re hpe na chye lu ai.
April (18) ya shana hkying (9:15) aten daram kaw mung Myen hpyen gumshem dap ni mare makau grup yin hkan shana hkying (10:30) aten daram du hkra laknak kaba gap shadam ai lam galaw ai re hpe na chye lu ai.

N-dai Myen hpyen gumshem dap ni gaw lai wa sai 2021 shaning htum maga shanhte a hpyen dap hpe KIA hpyen hpung ni wa htim gasat ai hpang kaw nna mare makau grup yin hte KIA ni nga ai ngu ntsen nhten ai Marau Bum maga de shani shana aten ntam laknak kaba ni hkrup mara gap shadam bang nga ai re hpe mung matut chye lu ai.

Myen hpyen gumshem dap ni ya na zawn aten n tam sinat laknak gap shadam ai lam jahkring hkring galaw ai majaw ginra mungmare masha ni gaw mungshawa hkra machyi hkrum wa na hpe hkrit tsang nga ma ai re.

Dai Myen hpyen gumshem dap ni gaw shanhte a hpyen dap wang shawng hku shana aten lai wa lai sa galaw ai Modo, Sengke ni hpe mung sinat hkan gap ai lam ni galaw nga ai majaw shana de hkying (6:00) aten hpang daw kaw nna mare kata pru prang hkawm ai lam nnga ai sha n-ga hpyen dap wang shawng hku Modo, Sengke lai hkawm ai lam mung nnga ai re hpe na chye lu ai.

Leave a Reply

*

This site uses Akismet to reduce spam. Learn how your comment data is processed.