Sinpraw Ginwang Ginjaw, Mai Ja Yang Muklum Mung Zup Gawknu kaw Ninggawn Mungmasa sharin hpawng hte Komiti Amu madu ni a hkrumzup bawngban hpawng hpe April (18) hte (19) lahkawng ya galaw nga ai lam na chye lu ai.
N-dai lamang hpe Mai Ja Yang Muklum Komiti ni kaw nna woi awn let gaw ai rai nna Ninggawn Mungmasa lam yan hpe mungchying mungshawa ni grau nna chye na hkawn hkrang wa na matu hte Wunpawng Mungdan Shanglawt Hpung shang salang ni hpung pati n gun ja wa na lam hta dumhprut ai lam ningra ai lam ni n byin na matu yaw shada na galaw ai re lam Sinpraw Ginwang Ginjaw Mai Ja Yang Muklum Komiti, Amu Madu Salang Kaba Mahkaw Gam Awng tsun ai.
N-dai hpawng lamang hta Ninggawn Mungmasa lam yan sharin hpawng sha n-ga Komiti Amu madu ni a hkrum zup bawngban hpawng mung galaw na re hpe matut na chye lu ai.
Ninggawn Mungmasa sharin hpawng hta Magam Dap, Makan Dap shagu na Hpu-awn ni, Pati lakung lakying kaw na mu gun ni, Mulum kata na PP, Pf hpung shang salang ni hte hpung garai n shang shi ai mungchying mungshawa ni mung sa du shang lawm ai re.
Ninggawn Mungmasa sharin hpawng hte Komiti Amu madu ni a hkrumzup bawngban hpawng hpe Sinpraw Ginwang Ginjaw Komiti Amu Madu, Du Kaba Maji Zau Ring kawn, woi hkaja sharin ya ai rai nna, matut nna mung jawng shagu de laksan sa du sharin ya ai lam, mungchying mungshawa ni hte Ramma ni hpe mung sharin ya na matu hkyen lajang da ai lam nga ai hpe chye lu ai.