Putao ginra, Tan Ja mare kaw dap jung nga ai Myen hpyen gusmhem dap ni gaw mare masha ni hpe shana aten pru hkawm ai lam n-galaw na hte pru hkawm ai mu yang gap sat na lam tsun jahkrit wa ai lam nga ai hpe na chye lu ai.
April shata praw kaw nna Putao ginra mare kahtawng shara ni hta Myen hpyen gumshem dap kawn hpyen n-gun jat, mare kata dum n-ta ni hta dap jung shara jahkrat ai lam laja lana galaw nga ai re.
Tan Ja mare kata kaw mung April (6) ya shani kaw nna Myen hpyen gumshem dap, hpyen n-gun (100) daram hte mare kata dum n-ta shagu ngu hte laika sharin jawng ni hta dap jung shara la nga ai sha n-ga Myen hpyen Gumshem dap ni hku nna shana pru hkawm ai ni hpe gap sat na ngu ndau wa ai majaw mare masha ni hkring tsang nga ma ai re lam mung na chye lu ai.
Lai wa sai Febuary praw (1) ya shani kaw nna KIA Masat (1) Dap Ba ginra rai nga ai Putao ginra Sumpyi Yang hte Lung Sha Yang mare grup yin hta Myen Hpyen gumshem dap ni hte KIA hpyen hpung ni gasat poi laja wa ai majaw ginra mungmasha ni Nam de hpyen koi yen hkawm mat ai lam nga ai. March (22) ya shani seng ang ai wuhpung wuhpang ni kawn bawng ban jahkrup ya ai hte tinang mare dum n-ta de bai wa nga ai hpang, ya na zawn Myen hpyen gumshem ni mare kata hpyen n-gun jat, dap jung shara la ai lam ni galaw nga ai ai majaw gasat poi bai laja wa nna Mungmare masha ni grau jam jau wa na hpe mung ginra masha ni hkrit tsang nga ma ai re.