KIA Masat (3) Dap Ba, KIA Masat (27) Dap Dung ginra hta Myen hpyen gumshem dap ni ding yang ngu na shamu shamawt hkawm nga ai majaw, KIA ni bawm hte hkap gap gasat ai sha n ga, ang katut gasat gala majan mung jahkring hkring byin nga ai re.
April (9) ya shana maga hkying (2:15) aten hta sha Han Htet mare makau Nambai Hka mahkrai mayan kaw Myen hpyen gumshem dap hpyen shamu shamawt hpung ni hpe KIA ni bawm hte hkap gap gasat ai lam nga ai.
Gumshem Myen hpyen dap Hk.L.Y (121) dap na n gun 100 daram gaw, Munghkawng hpyen dap kaw nna, Han Htet maga de lagaw lam hku yu wa ai kaw KIA hpyen hpung ni hkap gap gasat re hte Myen hpyen si hkala lam nga ai re hpe mung matut na chye lu ai.
Dai Myen hpyen gumshem dap hpyen hpung ni gaw Laika Zup Ja mare kaw nna, Munghkawng Myen hpyen gumshem dap kaw shang nhtawm, Han Htet mare maga de bai matut shamu shamawt shang wa ai ni re lam mung chye lu ai.
Lai wa sai April (6) ya shani hta mung Munghkawng Myen hpyen gumshem dap kaw na modo (4) hte Maji Gung Myen hpyen gumshem dap de hpyen n-gun jat, hpyen lang rung rai, lu sha ni htaw sa ya ai Myen hpyen gumshem shem dap modo hpung ni hpe Laika Zup Ja mare lahta Kumhpya Kawng kaw KIA hpyen hpung ni bawm hte hkap kapaw gasat ai lam mung nga sai re.