La Wa mare makau kaw Myen hpyen gumshem dap hpe KIA hpyen hpung ni bawm hkap kapaw

KIA Masat (2) Dap Ba, Masat (20) Dap Dung ginra, Danai Lido lam, La Wa mare makau Lagawng mare baw kaw April. (4) ya shana de hkying (1:10) aten daram hta Myen hpyen gumshem dap hte KIA hpyen hpung ni gasat gala byin ai lam nga ai.

Dum Bang Myen hpyen gumshem dap Hk.L.Y (298) dap kawn pru wa ai Hk.L.Y (238) hpyen n-gun (60) grup yin lawm ai hpyen shamu shamawt hpung ni gaw Kamaing Shin Bum lam maga hku na Lido lam de chying lau shamu shamawt hkawm ai kaw KIA hpyen hpung ni bawm hte numdaw lahkawng lang hkap gasat ai re lam chye lu ai.

Gasat gala byin ai ten Myen hpen gumshem dap maga na si hkala hkrum ai lam nga ai majaw Myen hpyen gumshem dap maga na mare makau grup hkan du hkra laknak kaba hkrup mara gap shadam ai lam nga ai hpe mung na chye lu ai.

Danai lido lam mayan hta Myen hpyen gumshem dap kawn hpyen n-gun jat lung wa ai lam, hpyen lang rung rai htaw shalai la ai lam ni ding yang galaw nga ai majaw dai ginra hta gasat poi jahkring hkring byin ai lam nga ai re, lai wa sai March.24 ya shani hta mung hpyen garum lung ai Myen hpyen gumshem dap hpyen hpung hpe KIA ni bawm hte hkap shing la gasat ai lam nga sai re.

 

Leave a Reply

*

This site uses Akismet to reduce spam. Learn how your comment data is processed.