Myen hpyen gumshem dap hte MNDAA ni gasat poi byin ai majaw Mungbaw ginra na Mungmare masha n kau hprawng koi yen

Mungmyit Sinli Ga, Kachin Sub-state, Mungbaw ginra hta Myen hpyen gumshem dap hte Kugang laknak lang rawt malan hpyen hpung MNDAA ni gasat poi jahkring hkring byin ai majaw ginra masha ni hprawng koi yen ra ai lam na chye lu ai.

April (3) ya shani kaw nna Mungbaw ginra, Hugan mare makau grup yin hkan Myen hpyen gumshem dap ni hte MNDAA ni gasat poi byin ai hta Mungmare masha nga ai mare kata de du hkra laknak kaba si wa hkrat kapaw ai lam ni nga wa ai majaw hkrit tsang nna Man Kawng mare masha htinggaw (50) jan daram Man Pin mare de koi yen mat sai lam na chye lu ai.

“Gap hkat ai gaw mani kaw na Hugan mare makau hkan gap hkat ai rai nga ai, ya dai ni mung dai kaw sha bai byin ai nga yang gaw Man Kawng mare masha ni gaw dai ni jang hkrit tsang na Man Pin mare de gan yen mat ma ai, gap hkat yang hkrit tsang ai ga rai nga, mare ting ngu na ram koi yen mat ai htinggaw (50) daram gaw rain a re” nga nna ginra masha langai tsun ai.

April. (4) ya shani hta mung Hugan mare makau kaw sha Myen hpyen gumshem dap hte MNDAA ni gasat poi byin ai lam nga ai rai nna Mai Hpang Myen hpyen gumshem dap kaw na mung gasat poi byin ai shara de laknak kaba ni gap bang nga ai lam matut na chye lu ai.