Mai Ja Yang Institute Of Education (MIED) Jawng Yu Hpawng

Mai Ja Yang Institute of Education (MIED) jawng a (5) lang hte (6) lang  na  jawng yu Janmau shagrau lamang hpe Hpaji Gindai  Gawk Nu kaw April (2) ya shani galaw  ai.

Jawng yu sai jawng ma ni hpe Jawng up Sara kaba kaw na jawngyu mungga shaga ai hta “MIED jawng gaw hpaji lam hpe madung tawn ai jawng rai nga ai dai ni janmau shagrau hkam nga ai ni gaw hpaji hpe ninggam langai mi hku na hkaja la lu sai  ni rai nna hpaji lam a mai kaja ai  hpe chye na hkawn hkrang sai ni rai nga sai majaw kaja ai hpe hta la n kaja ai hpe sharai rai nna tinang a matu, mungdan a matu, wunpawng myusha ni yawng a matu , mungkan a matu hpaji hte shakut shaja sa wa ga” nga nna tsun ai.

Janmau shagrau hkam la ai jawngma ni gaw 2019-2020 hte 2021-2022 jawng lung ladaw hta jawng ngut la sai Pre-College Program, Diploma In Education (Dip.Ed) program , Diploma in  TESOL (Dip. TESOL) program , na jawngma ni hte 2021-2022  jawng lung ladaw hta jawng ngut la sai Diploma In Teaching Chinese Language (Dip. TCL) program na jawngma ni yawng marai (575) tup re lam chye lu ai.

Mai Ja Yang Institute of Education (MIED) jawng hpe lai wa sai 1998 ning hta Sara hpaji sharin jawng TTS ngu nna hpaw sharin ya nga ai rai nna 2008-2009 ning kaw nna TTC ngu ai Sara shalat jawng ngu nna ninggam shatsaw sharin ya nga sai re hte 2018-2019 ning kaw na gaw MIED ngu nna ningam bai shatsaw sharin ya wa ai hpe chye lu ai.