KBC laika sasana saranum yan mazut roi rip sat kau hkrum ai (7) ning hpring ladu hkrum myit dum akyu hpyi hpawng galaw

KBC Laika Sasana Srn.Tangbau Hkawn Nan Tsin Hte Srn. Maran Lu Ra yan Mazut Roi Rip sat kau hkrum ai shaning (7) ning hpring ladu hkrum myit dum akyu hpyi hpawng hpe January (19) ya shani Myitkyina, Nawngnang mare, Jaw Bum kaw KBC ginjaw kaw nna, woi awn galaw ai lam chye lu ai.

Lai wa sai shaning hkan mung KBC ginjaw kawn woi awn nna srn yan mazut roi rip hkrum ai amu manghkang hte seng nna teng man ai mahtai hpe sawk sagawn lu na matu akyu hpyi hpawng lamang ni hpe Jaw Bum kaw mungshawa law law hte wu wu di di galaw ai lam nga sai raitim dai ning gaw ana zinli masa a majaw KBC ginjaw magam gun ni, Srn yan a nta masha ni, laksan saw shaga da ai manam ni hte masha marai (100) jan shang lawm let galaw ai re lam chye lu ai.

“Maroi nni matai htang ai nju ndawng ai myit hte gasat yang hpang jahtum anhte sum na, hkam sharang ai myit hte gasat ga, laknak lang na gasat ai ngu gaw shut ai nre raitim, laknak lang ai ngu kata kaw si mani ai ngu lawm ai, mungkan a tara naw hkan ra ai, dai tara gaw si mani ai re. Dai majaw saranum yan a mahtai hpe lu hkra gasat ai shaloi hkam sharang ga, saranum yan a bungli gaw majan langai hku sa ra bungli re dai majaw anhte hkam sharang ga, myit n daw ga, jahtum du hkra gasat ga” nga nna hpawng lamang hta KBC Ningbaw Sr.kaba Rev.Dr.Hkalam Samson mungga jaw ai.

KBC ginjaw kaw na mung ndai mabyin manghkang hpe jaw kaja ai mahtai lu hkra matut lit la woi awn galaw sa wa na re lam, matut tsun ai kaw na chye lu ai.

Saranum yan gaw lai wa sai 2015 ning January shata 19 ya shana, Mungmau ginwang Namtau buga Kawnghka mare kaw bungli gunhpai nga ai ten, shan lahkawng nga ai nta kaw nan mazut roi rip sat kau hkrum ai re.