KIA masat (3) dap ba, masat (27) dap dung ginra, Nam Mak Zup kaw January (18) ya shani hpyen shamu shamawt hkawm ai Myen hpyen gumshem dap hte Wunpawng Mungdan Shanglawt Hpyen Dap KIA ni gasat poi byin ai lam nga ai.
Myen hpyen gumshem dap Hk.L.Y (223) n-gun (100) grup yin lawm ai hpyen shamu shamawt hpung ni gaw Gawkngu Yang mare kaw na Bang Gaw mare mayan shamu shamawt hkawm ai ni rai nna dai shani Nam Mak Zup kaw hkring nga ai ten KIA hpyen hpung ni sa htim gap gasat ai hpang gasat poi byin wa ai re lam shawng lam shiga kaw na chye lu ai.
KIA masat (8) dap ba ginra, Moe Tar Gyi kaw mung January (18) ya shana de hkying (2:30) aten lawu ga de na lung wa ai Myen hpyen gumshem dap a Jet Nbungli lahkawng numdaw masum lang dabat nna bawm wa jahkrat bun ai lam mung nga ai re lam na chye lu ai.
KIA massat (9) dap ba, masat (44) dap dung ginra, Marau bum maga de mung dai shana hkying (8:30) aten Pyun Tung Lung kaw dap jung ai Myen hpyen gumshem dap Hk.M.Y (383,384) dap ni (80) MM ngu maram lu ai laknak kaba (15) lang hte laknak kaji (100) lang daram gap bang ai lam nga ai re hpe na chye lu ai.
N-dai laman Mungmyit Sinli Ga ginra de mung Myen hpyen gumshem dap ni hpyen shamu shamawt nga ding yang re majaw KIA, MNDAA hte gasat poi shani shagu naw byin nga ai rai nna majan nhpan kata hprawng koi yen ai mungshawa mung law jat nga ding yang re hpe chye lu ai.