Mungbaw ginra hta hpyen majan hpe hkrit tsang nna hprawng yen ai hpyen yen ni law jat wa

Mungmyit Sinli Ga, Kachin Sub-state, Mungbaw ginra hta gasat poi ni ding yang byin nna Myen hpyen gumshem dap ni kawn Mungmare masha nga ai mare kata de laknak kaba ni gap shadam nga ai majaw ginra masha ni hprawng koi yen nga ding yang re hpe na chye lu ai.

January (17) ya shani Mungbaw ginra Mung Yu (105) Mile kaw dung ai Myen hpyen gumshem dap ni mung mungshawa nga ai mare de laknak kaba hkrup mara gap shadam wa ai majaw Man Kawng mare masha marai (220) gaw dai shani jang Man Ping mare nawku jawng wang de koi yen shang wa ma ai lam nga ai.

Man Kawng mare makau hkan gasat poi ding yang byin ai sha n-ga mare ntsa hkan mung Kugang laknak lang rawt malan hpyen hpung MNDAA ni shara wa jahkrat nga nna gasat poi ni laja lana bai byin wa na hpe ginra masha ni hkrit tsang nga ma ai re.

“Ya hte hkan mung mare makau hkan gasat poi ni ding yang bai byin na, lai wa sai lahkawng masum ya hkan Man Kawng mare ntsa kaw MNDAA ni bai wa nga taw re nga yang mani mung Myen ni gaw Man Kawng mare ntsa de laknak ni bai gap bang ya ai re nga yang gaw shawoi na zawn gasat poi ni bai byin na hpe hkrit tsang ai majaw gan yen ra ai ga re” nga nna ginra masha langai tsun ai.

N-dai shata laman hta sha Mungbaw pa de Hpyen majan hpe hkrit tsang ai majaw hprawng koi yen shang wa ai hpyen yen mungshawa (500) jan daram du nga sai rai nna hprawng yen ai mungmare masha ni mung law jat nga ding yang re majaw hpyen majan laja wa yang lam shagu hta grau na yakhkak wa na hpe hpyen yen ni myit tsang nga ma ai re.