Mungbaw hte Khatar ginra kaw Myen hpyen gumshem dap hte MNDAA, PDF ni gasat poi byin

Mungmyit Sinli Ga, Kachin Sub-state, Mungbaw ginra Wing Seng mare makau kaw January (15) ya shani hkying (12:50) aten daram hta hpyen shamu shamawt hkawm ai Myen hpyen gumshem dap hte MNDAA ni gasat poi byin ai lam nga ai.

Myen hpyen gumshem dap ni gaw hpyen n-gun jat bang nna hpyen shamu shamawt htu shadut shang wa ai majaw gasat poi byin ai lam re hte dai ginra mayan Myen hpyen gumshem dap ni hpyen shamu shamawt nga ding yang re majaw January (12) ya shani Nawng Heng, Loi Sa mare makau grup yin hkan MNDAA hte Myen hpyen gumshem dap ni gasat poi laja lana byin ai lam nga nna ginra mungmare masha ni Mungbaw Pa hte Wing Seng de hprawng koi yen ra mat ai lam nga ai re.

Ya na zawn hpyen majan hpe hkrit tsang nna hprawng yen shang wa ai raitim Wing Seng mare makau kaw gasat poi bai byin wa ai majaw ginra masha ni gaw Mungbaw Pa de bai kahtap koi yen mat ai re hte matut nna mung gasat poi naw byin nna koi yen shara nnga yakhkak wa na hpe ginra masha ni myit tsang nga ma ai re.

Khatar ginra kaw mung January (15) ya jahpawt hkying (7:00) aten hta hpyen shamu shamawt hkawm ai Myen hpyen gumshem dap hpyen hpung hte PDF ni gasat poi byin ai lam nga nna shani hkying (11:30) aten Mali hka hkan nna Jinghpaw mung ginra de shamu shamawt lung wa ai Myen hpyen gumshem dap a hka Sanghpaw Li lahkawng mung PDF ni a hkap shing la gasat hkrum ai lam  nga ai re hpe mung na chye lu ai.