KIA masat (36) dap dung ginra kaw Myen hpyen gumshem dap hte KIA ni gasat poi byin

KIA masat (6) Dap Ba, masat (36) dap dung ginra, Munggu ginwang, Sama mare hte Hkabang mare lapran kaw January (13) ya shana de hkying (1:15) aten daram hta Myen hpyen gumshem dap hte KIA ni gasat poi byin ai lam nga ai.

Myen hpyen gumshem dap Tatma (77) ngu maram lu ai n-gun (100) daram lawm ai hpyen shamu shamawt hpung ni gaw KIA hpyen dap nga ai ginra mayan de shamu shamawt pru wa ai majaw KIA masat (36) dap dung kata na hpyen hpung ni hkap shing la gasat ai kawn lahkawng maga gasat poi byin wa ai lam shawng lam lit nga salang langai tsun ai.

Gasat poi minutes (10) jan byin ai hpang gasat poi zim mat nna Myen hpyen gumshem dap hpyen hpung ni gaw Sama mare makau grup yin hkan bai matut shamu shamawt nga gayin hkawm ai majaw gasat poi ni naw matut byin wa mai ai lam mung dai salang wa tsun maram da ai.

Lai wa sai January praw (2) ya shani hta mung Mung Li bum kaw KIA hte hpyen shamu shamawt hkawm ai Myen hpyen gumshem dap Tatma (99) ni gasat poi byin ai lam nga sai re.

Mungmyit Sinli ga ginra hta Myen hpyen gumshem dap ni kawn hpyen n-gun jat bang nna htu shadut nga ding yang re majaw KIA, MNDAA hte gasat poi matut manoi naw byin nga ai hta majan n hpan hpe hkrit tsang nna gasat poi hte ni nawn ai mungmare masha ni gaw hprawng koi yen ra ding yang naw re lam mung chye lu ai.