KIA masat (6) dap dung ginra hte Sagaing ginra ni hkan Myen hpyen gumshem dap ni Nbung Li hte bawm wa jahkrat gasat

KIA masat (9) dap ba, masat (6) dap dung ginra, Shagan Kawng kaw January (13) ya jahpawt hkying (1:00) aten daram hta Myen hpyen gumshem dap ni Hpyen Nbung Li masum hte bawm wa jahkrat gasat ai lam nga ai.

Gasat poi byin ai lam nnga tim Myen hpyen gumshem dap Hpyen Nbung Li masum a kajawng sha wa htim gasat ai rai nna Mung masha hkra hkala hkrum ai lam nnga ai raitim ginsum n kau hten hkrum ai lam nga ai re hpe mung matut na chye lu ai.

Lai wa sai shata hkan mung KIA masat (9) dap ba, masat (6) dap dung , masat (26) dap dung ginra hta Myen hpyen gumshem dap ni Hpyen Nbung Li ni jai lang nna bawm wa jahkrat gap gasat ai lam ni nga ai majaw dum nta n kau hten hkrum nna Mungmare masha hprawng yen ra ai lam ni mung nga lai wa sai re.

Sagaing, Hti Chyaik ginra kaw mung dai hpawt hkying (10:00) aten hta Myen hpyen gumshem dap Hpyen Nbung Li lahkawng bawm wa jahkrat ai hta Mungmasha nga ai mare kata hkan wa hkrat kapaw ai lam nga ai hpe na chye lu ai.

January (12) ya shana maga hkying (12:45) aten daram hta mung Katha ginra, Moe Tar Gyi makau grup yin hkan Myen hpyen gumshem dap ni Jet Nbung Li masum hte numdaw masum lang bawm wa jahkrat gasat ai majaw Mungmare masha marai (5 ) hkala hkrum ai hte dum nta (6) wan hkru hten hkrum mat ai lam nga nna ginra masha ni hprawng koi yen mat ai lam nga ai.