Danai Lido lam, Jahtu Zup mare RCM makam masham nawku hpung ni a kyu hpyi bum kaw shara jahkrat nga ai Myen hpyen gumshem dap Hk.L.Y (297) dap hte P.T.Ts pawng hpawm hpung ni December (27) ya shani Lawt Ja mare de 81 MM ngu maram lu ai laknak kaba (7) lang gap bang ai lam nga ai.
Dai shani Jahtu Zup mare kaw nga ai P.T.Ts ni KIA hpyen dap nga ai shara de shamu shamawt shara la wa majaw gasat poi byin ai lam nga ai re, dai gasat poi byin ai hpang kaw nna Myen hpyen gumshem dap ni kawn Mungmare masha nga ai mare de laknak kaba gap bang wa ai rai re lam na chye lu ai.
December (27) ya shana hkying (9:40) aten hta mung KIA masat (9) dap ba, masat (44) dap dung ginra, Shinggat Yang mare kaw nga ai Hk.M.Y (383,384) dap ni lup wa kawng maga de 82 MM ngu maram lu ai laknak kaba (10) lang hte laknak kaji (50) lang daram gap bang ai lam nga ai lam chye lu ai.
Lai wa sai December (24) ya shani hta mung Myen hpyen gumshem dap Hk.M.Y (383,384) dap ni hte KIA hpyen hpung ni gasat poi byin ai hta Myen hpyen gumshem dap ni gap dat ai laknak kaba si langai Singgat Yang mare kaw wa hkrat kapaw nna Mungmasha hkra hkala ai lam nnga tim dum nta langai pala hkyep hkra ai lam ni nga ai sai re, Myen hpyen gumshem dap ni aten ntam laknak kaba hkrup mara gap shadam nga ai majaw Mungshawa hkra hkala hkrum wa na hpe ginra masha ni hkrit tsang nga ma ai re.