Wunpawng mungdan shanglawt hpyen dap KIA masat (2) dap ba, masat (14) dap dung ginra Jahtu Zup mare makau lam mali zup kaw December (27) ya jahpawt hkying (10:15) aten kaw na shani hkying (12:00) aten daram du hkra KIA hte P.T.Ts ni gasat poi byin ai lam nga ai.
Myen hpyen gumshem dap ni a lagaw lata tai ya nna Jahtu Zup mare kaw dap jung nga ai P.T.Ts ni gaw KIA hpyen dap ni a ginra de htu shadut shara maden la nna dap shara jahkrat wa ai majaw KIA hpyen hpung ni wa htim gap gasat ai re lam shawng lam lit nga salang ni kaw na chye lu ai.
Gasat gala byin ai hta P.T.Ts ni a hpyen lang rung rai sinat laknak machyu pala hte 4X4W Modo langai, Russia RPG lau 1, M-79 MM, Miwa Pala Din ni hpe KIA hpyen hpung ni lu zing madu la kau lu sai lam chye lu ai.
Lai wa sai December (24) ya shani hta mung Sarmaw, Kanyin Myai Myen hpyen gumshem dap Hk.M.Y (383), Hk.M.Y (384) hpyen dap shara lahkawng kaw KIA hpyen hpung ni sa htim gap gasat nna Myen hpyen gumshem dap ni a hpyen lang rung rai sinat machyu pala ni law law zing madu la lu ai lam mung nga sai re.