Laiza kaw nga ai mungshawa ni hpe Covid-19 ana masum lang dabat jep ai hta August (23)ya shani marai (7) kaw ana bai jep mu jat ai lam nga ai.
“Anhte lahkawng ya ngu na August (22) ya, (23) ya kaw Laiza grup yin tsi jep yu ai shaloi shinggan na masha ni yawng gaw Positve pru ai nnga sai, yawng Negative rai sai, mani mu ai gaw mi shawng e Shanan Boarder kaw jep mu ai Positive ni hte rau nga ai, hkamja lam masam maram hkamla ai ni kaw jep mu ai re” nga nna Ginjaw Covid-19 ana zinli makawp ninghkap komiti ningtau ningbaw Dkb Nhpang Naw Bu tsun ai.
Ginjaw Covid-19 ana zinli makawp ninghkap komiti kaw nna gaw Laiza ginra hpe Covid tsi jep ai masum lang jep ngut ai mahtai hta hkan na ana hkoi san ai ten she Lockdown dawm ya na matu masat da ai re.
“Lockdown hpyan gaw hpyan na re, hpyan ai nga tim kalang ta yawng hpe hpyan ai hku nre sha, gaungwi ngwi hpyan na re, anhte gaw makawp maga lam hte seng na mung August shata (25) ya shani zuphpawng galaw nna ana zinli makawp maga magam bungli hpe matut na galaw sa wa re” nga nna mung matut tsun ai.
Laiza Ginra kata ya aten Covid-19 ana kap hkrum nna tsi gawn lajang hkamla nga ai masha marai (53) nga ai rai nna, Hkamja lam masam maram hkamla nga ai masha marai (64) nga ai re hpe chye lu ai.