Hpyen n-gun jat lung wa ai Myen hpyen gumshem dap ni hpe KIA hpyen hpung ni hkap gasat

Wunpawng mungdan shanglawt hpyen dap masat (9) dap ba, masat (26) dap dung ginra de hpyen garum lung wa ai Myen hpyen gumshem dap dap nu (33) kata na Hk.M.Y (116) ni hpe Nammaw hte Tamahkan mare lapran Hpri Bum kaw KIA hpyen hpung ni bawm hte hkap shing la gasat ai lam na chye lu ai.

N-dai Myen hpyen gumshem hpyen hpung ni gaw hpyen n-gun marai (30) daram lawm ai re hte shawng lam de hpyen garum lung wa ai hpung ni re hpe chye lu ai.

KIA hpyen hpung ni kawn bawm hte hkap shing la gasat ai majaw Myen hpyen gumshem dap maga na marai lahkawng asak si mat ai rai nna hkala hkrum ai masha mung lawm na masa nga ai raitim tup hkrak gaw nchye lu shi ai majaw matut sagawn nga ding yang re lam shawng lam na lit nga ai salang ni tsun ai.

N-dai Myen hpyen gumshem hpyen hpung ni gaw makau grup yin de laknak kaba ni gap shadam nna Tamahkan Myen hpyen dap de bai yu wa sai lam na chye lu ai.

Leave a Reply

*

This site uses Akismet to reduce spam. Learn how your comment data is processed.