Sumpyi Yang ginra masha ni arung arai jahten shaza ai ngu ai ga baw hte laika bang shawk shawn  

Putao Ginwang, Sumpyi Yang mare grup yin Mali hka mayan kaw ja htu sha nga ai Company lauban ni kaw nna ginra masha ni hpe arung arai jahten kau ya ai ngu nna Putao ginwang up hkang rung de laika bang shawk shawn da ai lam na chye lu ai.

Sumpyi yang mare masha ni kawn tara n shang ja htu sha ai lam hpe dawm ya na matu ja htu company lauban ni hpe lang hte lang tsun ai lam galaw ai raitim matut shanang nga ai majaw lai wa sai May (17) ya shani mare masha n-gun marai (100) jan shanglawm ninghkap n-gun madun nna ginsum ni hpe wan nat jahten kau ya ai ai lam nga ai majaw ya na zawn shawk shawn wa ai re hpe chye lu ai.

 “Shanhte company ni hpe num daw lahkawng lang laika bang nna Ja htu sha ai lam lawan dawm jahkring na matu tsun ai raitim matut nna ja htu sha nga ai majaw num daw masum lang ngu na hta gaw mare masha ni kawn dai shara de sa nna shawa n-gun madun ai lam hta woi awn ai ni gaw arung arai n jahten ya na matu tsun ai raitim dai shara kaw du ai shaloi hkrup mara kam ai hku lamu ga ni hpe chyinglau htu sha da ai hpe wa mu nna mare masha ni pawt let jahten shaza kau ai lam ni mung lawm mat mat ai, dai hpe n htang hku mare masha ni laika bang shawk shawn ai ga nga”nga nna mare masha langai tsun ai.

Ya na zawn Ja htu company ni kawn gara uhpung uhpawng asuya ni de mi laika bang shawk shawn ai lam galaw ai raitim Ja htu sha ai lam hpe ginra masha ni gaw tsep kawp a hkang n jaw, ninghkap sa wa na re lam mung ginra masha ni tsun nga ma ai re.

Ja htu sha nga ai shara gaw Sumpyi Yang mare masha ni shaning shagu ginhtawng aten yi sun, hkai lu hkai sha nna kan bau magam bungli galaw sha ai shara re sha n-ga makau grup yin shingra tara hpe makawp maga ai hku nna NLD Asuya aten kawn mare masha ni gaw Mali hka mayan Ja htu sha ai lam dawm jahkring na matu tsang hte tsang laika bang nna ninghkap nga ai wa ai re hpe chye lu ai.

 

Leave a Reply

*

This site uses Akismet to reduce spam. Learn how your comment data is processed.