Daw Hpum Yang mare kata kaw Myen hpyen gumshem ni wa nga taw ai majaw ginra masha ni hkrit tsang

Daw Hpum Yang mare tsi rung, Hpungkyi jawng, Balik dap hte mare uphkang rung ni kaw June (20) ya shani kaw nna Myen hpyen gumshem hpyen hpung ni shara wa jahkrat nga ai majaw ginra masha ni hkrit tsang nga ai lam na chye lu ai.

N-dai Myen hpyen gumshem hpung ni gaw hpyen n-gun (200) daram re hte mare kata shara wa jahkrat nga ai majaw mare makau grup yin hkan gasat poi byin wa na hpe ginra masha ni grai myit tsang nga ma ai re.

Myen hpyen gumshem dap ni gaw mare kata de hpa majaw shara wa jahkrat nga ai hpe tup hkrak n chye lu ai raitim hpyen n-gun, hpyen lang arung arai, malu masha htaw shalai ya ai modo ni hpe shim lam la ya ai hpyen hpung ni rai na masa nga ai nga nna mung shawng lam na lit nga ai salang ni tsun maram nga ma ai re.

Myen hpyen gumshem dap ni gaw hpyen n-gun, laknak arung arai ni hpe matut manoi htaw shalai nga ai majaw Daw Hpum Yang, Num Lang, Laja Yang lam mayan kaw Myen hpyen gumshem dap ni hte Wunpawng mungdan shanglawt hpyen hpung ni gasat poi jahkring hkring byin nga ai re hpe chye lu ai.
Myen hpyen gumshem ni gaw Loi mawk hte Dung Hkung mayan de mung shimlam la nna ya aten hpyen garum lung ai modo ni shalai la ai lam nga ai re hpe na chye lu ai.

Leave a Reply

*

This site uses Akismet to reduce spam. Learn how your comment data is processed.