Amyu Shayi Ni Hpe Lung Seng Ret Shatsawm Ta Hpaji Sharin Ya Nga

Hpakant, Maw Si Zar Mare kaw Amyu Sha Zin Lum Hpung kaw nna hpaw ninghtan da ai Lung Seng ret shatsawm bungli dabang hta Amyu Shayi ni hpe lung seng ret shatsawm ai ladat lata hpaji sharin ya nga ai hpe chye lu ai.

Lung Seng ret shatsawm magam bungli lata hpaji sharin ya ai gaw “Kani nanghpam malu masha dawn jasan kau lu sai amyu shayi ni hpe madung tawn nna manu jahpu n la ai sha kan bau magam bungli jaw lu na matu sharin ya ai re” nga nna Amyu Sha Zinlum Hpung magam gun Lahtaw Uma tsun ai re.

Maw Ga Ginra re majaw Lung Seng hte kan bau lu na matu, dinghku kanu ni tsan ai shara de pru hkawm n ra ai sha tinang dum n ta kaw nga let kan bau magam bungli lu, shang gumhpraw lu na hpe mung myit mada let sharin ya ai re hpe chye lu ai.

Ya a ten Lung Seng ret Ta Hkawn, Ta Chyawp madang sha naw lu sharin ya ai raitim matut nna mung madang shatsaw let sharin ya lu na matu shajin nga ai hte ta tut hta kung kyang mat hkra aten shata (6) daram na ai rai nna myit lawm ai kadai hpe raitim hkap la nga ai hte N dai zawn sharin ya nga ai gaw (3) ning daram rai sai hpe chye lu ai.

Leave a Reply

*

This site uses Akismet to reduce spam. Learn how your comment data is processed.