KIA hte Myen Hpyen Gumshem Dap ni Gasat Poi matut byin

KIA Masat (5) Dap Ba Ginra Dawhpum Yang kaw nna shamu shamawt lung wa ai Myen Hpyen Gumshem Dap ni hpe May (11) ya shani KIA hpyen hpung ni Tar Seng makau Nawng Hpa kaw Minutes (30) daram gasat poi laja lana byin ai lam na chye lu ai.

Dai hpang Alaw Bum maga de mung Myen Hpyen Gumshem Dap ni kawn Hpyen Nbung Li lahkawng hte wa gap gasat ai lam ni mung nga ai re hpe chye lu ai.

May (10) ya shana hkying (4:15) aten daram hta mung Num Lang kaw na Shang Htung Bum maga de htu shadut lung wa ai Myen Hpyen Gumshem Dap ni hpe KIA hpyen hpung ni hkap shing la gap gasat ai lam mung nga ai lam shawng lam na lit nga ai salang ni tsun shana wa ai.

KIA Masat (3) Dap Ba, Masat (15) Dap Dung Ginra, Kadaw Bum kaw mung May (11) ya shani KIA hte Myen Hpyen Gumshem Dap ni gasat poi byin ai lam nga ai rai nna, Myen Hpyen Gumshem Dap ni kawn KIA Masat (27) Dap Dung Ginra, Madan Yang de mung Jet Nbung Li lahkawng hte wa gap gasat ai lam nga ai re hpe chye lu ai.

KIA Masat (9) Dap Ba, Masat (44) Dap Dung Ginra, Kamaing Byuha Kawng kaw nga ai Myen Hpyen Gumshem ni mung May (10) ya shani Si En hkauna pa maga de laknak kaba kalang gap bang ai lam nga ai re hpe mung na chye lu ai.

KIA hpyen hpung ni hte Myen Hpyen Gumshem Dap ni Jinghpaw Mung Ginra sha n-ga Lahta Sammung, Mungmyit Sinli Ga Ginra KIA Masat (4) Dap Ba, Masat (6) Dap Ba hte Masat (10) Dap Ba Ginra nkau hta mung gasat poi ni byin ai re hpe na chye lu ai.

Leave a Reply

*

This site uses Akismet to reduce spam. Learn how your comment data is processed.