Namti Lambraw Yang Pat Jasan ni kawn Mare buga kata shimlum lam la ya nga

Namti, Lambraw Yang Buga Pat Jasan Hpung ni kawn tinang a mare buga kata Mungshawa ni shim lum lam lu na matu shim lam la ya ai magam bung li hpe matut manoi galaw nga ai lam Pat Jasan Komiti ni tsun ai.

Lambraw Yang Pat Jasan Hpung ni kaw nna mare kata pat jasan magam bungli shang ai lam ding yang n lu galaw ai raitim masa hta hkan nna mare buga kata nga ai Mungshawa ni shimlum hkra lagu lagut hpyen, rung rai kashun ai hpyen hte kaga mungmasa hpyen masa hte seng nna makawp lu na matu n-dai magam bungli hpe galaw ai re lam chye lu ai.

“Masa hta hkan nna shana shagu mare kata hkan gawan ai zawn re ni, hkan sin ai lam ni galaw nga ai. shana hkying (9) hkying (10) hkying (11) hkan gayin ai zawn re rai nga” nga nna Lambraw Yang buga Pat Jasan Ningbaw Rev.Maran Yaw Htung tsun ai.

Mare kata shimlum lam la ya ai magam bung li hpe lai wa sai shata 3,4 daram kaw nna galaw sai re lam hte n-dai magam bungli hta Lambraw Yang buga pat jasan hpung magam gun ni, garum kahtau magam gun ni marai (20) daram shang lawm gun hpai nga ai lam chye lu ai.

Ya na zawn mare buga kata hta shim lam la ya ai magam bungli hpe Mung masa shuk shanut wa ai aten kaw nna hpang n-htawm Mare kahtawng nkau ni hta Pat Jasan magam gun ni hku nna lit la gun hpai ai lam nga ai zawn nkau mare kahtawng ni hta gaw Ramma hte Kawa la ni pawnghpawm ta gindun nna galaw ai lam ni mung nga ai re.

Leave a Reply

*

This site uses Akismet to reduce spam. Learn how your comment data is processed.