Jinghpaw Mung Ginra hte Mungmyit Sinli Ga Ginra ni hta KIA hte Myen Hpyen Gumshem ni Gasat Poi matut byin

KIA Masat (2) Dap Ba, Masat (11) Dap Dung Ginra, Maran Kahtawng hte Makawk Zup lapran kaw May (8) ya jahpawt hkying (8:00) aten daram hta Dumbung Mare kawn Danai lam de shamu shamawt lung wa ai Myen Hpyen Gumshem Dap ni hpe KIA Hpyen Hpung ni bawm hte hkap shingla gap gasat ai lam nga ai.

Dai Shani Hkying (12:30) aten daram hta mung KIA Masat (4) Dap Ba, Masat (34) Dap Dung Ginra Ye Bung kaw dap jung nga ai Myen Hpyen Gumshem Dap ni hte KIA Hpyen Hpung ni gasat poi byin ai lam nga ai rai nna KIA Masat (10) Dap Ba, Masat (39) Dap Nawng Dap Dung Ginra, Namba Hkyi Paju mayan kaw mung jahpawt daw hkying (9:30) aten daram hta KIA hte Myen Hpyen Gumshem Dap ni gasat poi byin ai lam nga ai re.

KIA Masat (5) Dap Ba, Masat (25) Dap Dung Ginra, Alaw Bum, Salawng Kawng makau grup yin de mung Myen Hpyen Gumshem Dap ni kawn lai wa sai April shata kaw nna Nbung Li hte shani shagu ngu na daram bawm sa jahkrat wa gap gasat nga ding yang rai nga ai hta May. (7) ya shani hta mung Salawng Kawng (Tower Shadaw) grup yin, Alaw Bum,  shara ni hkan jahpawt hkying (9:30) aten daram kaw nna shana hkying (7:30) aten daram du hkra Jet Nbung Li ni hte Numdaw (10) lang daram bawm wa jahkrat wa gap gasat ai lam ni nga ai rai nna Myen Hpyen Gumshem Dap ni gaw KIA hte Gasat Poi ginra ni de laknak kaba ni matut manoi gap bang ai sha n-ga mare kata de du hkra laknak kaba gap bang ai majaw Mungmasha hkra hkala si sum ai lam ni mung ding yang byin hkrum nga ai re hpe chye lu ai.

Leave a Reply

*

This site uses Akismet to reduce spam. Learn how your comment data is processed.