KIA ni hte Myen Hpyen Gumshem Dap ni Gasat Poi Matut Manoi byin

KIA Masat (9) Dap Ba, Masat (44) Dap Dung Ginra Chyauk Htu hte Ma-u Pyin Mare lapran kaw May (3) ya shani hkying (10:00) aten daram kaw nna KIA hte Myen Hpyen Gumshem Dap ni Gasat Poi byin ai lam nga ai re hpe chye lu ai.

Myen Hpyen Gumshem Dap ni gaw Kamaing Mare kawn htu shadut shamu shamawt lung wa ai majaw KIA Hpyen Hpung ni hkap shing la gap gasat ai kawn gasat poi byin wa ai re hte gasat poi byin ai maga de Nam Ya Mare kaw dap jung nga ai Myen Hpyen Dap ni kawn mung laknak kaba gap bang ai lam nga ai lam shawng lam na lit nga ai salang langai tsun ai.

“Nam Ya Mare kaw na Myen Hpyen dap ni mung laknak kaba ni gap bang ya ai lam nga ai, mare masha mungshawa ni hkra hkala ai lam gaw nna ai raitim Nam Ya de na Myen Hpyen n-gun ni 38 ram gaw hpyen garum bai lung wa ai zawn nga ai, gasat gala gaw naw matut byin wa mai ai” nga nna dai salang wa matut tsun ai.

Myen Hpyen Gumshem ni kawn KIA Masat (5) Dap Ba Ginra hta mung May (3) ya jahpawt hkying (8:00) aten daram kaw nna Myotit, Kung Law makau grup yin hkan Jet Nbung Li langai, Helicopter langai hte bawm wa jahkrat, wa gap gasat ai lam ni nga majaw tinang KIA ni kawn hkap shing la gap dat ai hta Myen Hpyen Gumshem ni a Helicopter langai wan hkru hten nna Kung Law mare makau kaw hten hkrat mat ai lam nga ai re hpe chye lu ai.

Helicopter wan hkru hten hkrat mat ai majaw Myen Hpyen Gumshem ni kawn mungshawa nga ai mare kata de du hkra laknak kaba gap bang ai majaw mungshawa asak si sum ai lam, hkala hkrum ai lam ni mung nga ai nga nna ginra masha ni tsun ai.

 

Leave a Reply

*

This site uses Akismet to reduce spam. Learn how your comment data is processed.