Masat Yan (7) Basic Media Wunkat Yu Hpawng Galaw

Wunpawng Mungdan Shanglawt Asuya Shiga Magam Dap kaw nna hpaw sharin ai Masat yan (7) Basic Media Wunkat yu hpawng hpe May. Praw (1) ya shani Shiga Magam Dap Ginjaw Rung Zuphpawng Gawknu kaw galaw ai lam nga sai.

Wunkat hpaw sharin ai lam gaw Shiga Magam Dap kata na  magam bungli grau nna masan sa wa lu hkra yaw shada let magam gun nnan jat bang la lu na matu hpaw sharin ai re hpe chye lu ai.

Wunkat yu hpawng hta Shiga Magam Dap Lit Hkam Dkb. Nhpang Naw Bu kaw nna “NID gaw KIO a gawng malai tai ai shiga dap re hpe chye na hkap la let shiga magam dap a lashum ga hte maren magam bungli hpe galaw ra ai” nga nna jawng yu Jawng ma ni hpe shatsam mungga jaw ai.

Rawt malan ai shiga dap re majaw  yakhkak jam jau ai lam hpe hkam sharang let magam bungli hpe myit maju jung galaw n-htawm teng man ngang kang ai shiga ni hpe shapoi lu hkra shakut shaja nna, kung zet galu kaba ai, amyu hpe akyu jaw ai kashu kasha magam gun kaja ni hkrai rai wa mu ga nga nna mung matut shatsam ai.

Wunkat yu hpawng hta jawng yu sai Jawng Ma ni hpe Dkb. Nhpang Bu kaw nna jawng yu lekmat jaw shagrau ya ai hte shiga magam dap magam gun ni kaw nna shiga magam bungli hta shakut shaja ningtawn ai magam gun ni hpe mung kumhpa shagrau sha-a ai lam ni galaw sai re.

Masat Yan (7) Basic Media Wunkat hpe Feb. 11 ya shani kaw nna hpang n-htawm hpaw sharin wa ai re hte Jawng Ma yawng marai (13) sharin hkam la lu sai re hpe chye lu ai.

Leave a Reply

*

This site uses Akismet to reduce spam. Learn how your comment data is processed.