Myen Hpyen Gumshem ni kawn Nbung Li ni hte bawm wa jahkrat gap gasat ai lam ni matut manoi naw galaw

Myen Hpyen Gumshem ni kawn KIA hte gasat poi byin ai shara hte makau grup yin shara ni hkan Jet Nbung Li, Helicopter ni jai lang let bawm wa jahkrat ai lam, wa gap gasat ai lam ni galaw ai sha n-ga laknak kaba ni gap bang ai lam ding yang naw galaw nga ai re hpe chye lu ai.

April (30) ya shani hta mung Manmaw, N-mawk kaw dap jung nga ai Myen Hpyen Gumshem Dap ni kawn Salawng Kawng makau grup yin de laknak kaba gap bang ai lam nga ai sha n-ga Jet Nbung li ni pyen gawai ai lam ni nga ai raitim bawm jahkrat ai lam, wa gap gasat ai lam ni nga nnga hpe tup hkrak n chye lu shi ai nga nna lit nga ai salang langai tsun ai.

April (29) ya shani hta gaw Ginjaw Ginra Salawng Kawng grup yin de Jet Nbung Li lahkawng hte wa gap ai lam nga ai rai nna shana de hkying (4:00) aten daram kaw na hkying (5:00) aten laman Jaw Maw Post maga de Jet Nbung Li langai hte bawm wa jahkrat, wa gap ai lam nga ai re hte shana de hkying (5:45) aten daram hta mung KIA Masat (25) Dap Dung maga de Jet Nbung Li lahkawng hte bawm wa jahkrat, wa gap gasat ai lam mung nga ai re hpe chye lu ai.

Myen Hpyen Gumshem ni kawn laknak kaba ni gap bang ai lam, Jet Nbung Li ni jai lang let gap gasat ai lam ni a majaw Mungshawa hkra hkala ai lam, asak si sum ai lam ni law wa ai sha n-ga Hpyen n-gun jat bang nna KIA ni nga ai shara de htu shadut nga ding yang re majaw KIA hte Myen Hpyen Gumshem ni Gasat Poi mung matut manoi naw byin ai lam nga ai re.

Leave a Reply

*

This site uses Akismet to reduce spam. Learn how your comment data is processed.