Mai Ja Yang Muklum Kata COVID-19 Ana Zinli Makawp Maga Tsi Htu Ya Nga

Sinpraw Ginwang Ginjaw Mai Ja Yang Muklum kata nga ai Mungshawa, Dap Shawa ni hte Mai Ja Yang Muklum makau grupyin hta nga ai Hpyen Yen Mungshawa ni yawng hpe April (20) ya shani kaw nna COVID-19 Ana Zinli makawp maga tsi htu ya nga ai lam na chye lu ai.

Mai Ja Yang Manau wang kaw makawp maga tsi htu ya ai lam galaw nga ai hta tsi htu ngut sai Mungshwa dap shawa ni hpe gaw Sinpraw Ginwang Ginjaw COVID-19 Ana Zinli Makawp Ninghkap Komiti kaw nna tsi htu hkamla ngut ai masat lekmat jaw ai lam galaw nga ai re hpe chye lu ai.

Dai lekmat gaw Check Point ni hpe lai hkawm sa ai hta sung lang na matu rai nna, COVID tsi htu ngut ai lekmat nlawm ai ni gaw hkawm sa hkawm wa na rai yang san da ai Quarantine shara hta nhtoi (21) ya Quarantine hkam la ra na lam chye lu ai.

Mungshawa ni hpe Swab jep ai lam, hkamja lam jep ya ai lam, ningmu jahpaw ai lam shawng galaw n-htawm, tsi htu ya ai lam hpe galaw nga ai re hte Ginwang Ginjaw kata na Ginwang shagu hta mung sa du htu ya ai lam hpe galaw na re hpe chye lu ai.

“Tsi jep ngut nna hpa nra ai Mungshawa ni hpe gaw tsi htu ya nga ai re, Ya gaw matut manoi ginwang ginjaw kata shara ni hta tsi htu ya mat na re”nga nna mung Sinpraw Ginwang Ginjaw COVID-19 Ana Zinli Makawp Ninghkap Komiti Slg, Slkb Lazum La Doi ya na zawn tsun ai.

KIO Uphkang Ginra kata, COVID-19 Ana Zinli Makawp Ninghkap tsi htu ya nga ai shara ni hta na Mungshawa ni, COVID-19 Ana Zinli Makawp Ninghkap tsi hpe yawng htu hkamla na matu, Ginjaw COVID-19 Ana Zinli Makawp Ninghkap Komiti kaw na mung April (17) ya shani bai kahtap n-dau da ai lam nga ai re.

Leave a Reply

*

This site uses Akismet to reduce spam. Learn how your comment data is processed.