KIA Masat (9) Dap Ba Ginra hta KIA hte Myen Hpyen Dap ni Gasat Poi Matut Manoi Naw Byin

KIA Masat (9) Dap Ba, Masat (26) Dap Dung Ginra Hkwi Lung kaw Dap Jung nga ai Myen Hpyen Dap ni hte KIA Hpyen Hpung ni April (20) ya jahpawt hkying (3:00) aten daram kaw nna Gasat Poi laja lana bai byin ai lam nga ai.

April (19) ya shani hta mung KIA Masat (9) Dap Ba Ginra, Tang Gau Bum grup yin kaw KIA hte Myen Hpyen Dap ni Gasat Poi byin ai lam nga ai sha n-ga Myen Hpyen Dap kawn Jet Nbung Li, Helicopter ni hte Gasat Poi byin ai makau grup yin hkan bawm ni wa jahkrat ai lam, jak sinat ni hte wa gap gasat ai lam ni galaw ai majaw makau grup yin hkan nga ai Mungshawa ni hkrit tsang nna hprawng yen ai lam ni mung nga ai re hpe na chye lu ai.

“KIA Masat (9) Dap Ba, Dap Dung (26) de gaw jahpawt hkying (3) kaw na gasat poi byin ai lam nga ai, ngut na KIA Masat (8) Dap Ba Ginra maga de gaw Nam Hkyi kaw nga ai Myen Hpyen Dap Hk.M.Y (16) ni jahpawt hkying (2) daram kaw na makau grup yin de sinat laknak kaji ni majoi gap dum bre ai lam nga ai raitim KIA hte gaw gasat poi grai laja hkra n byin shi ai”nga nna mung shawng lam na lit nga ai salang langai tsun ai.

KIA Masat (8) Dap Ba Ginra kaw April (19) ya shani Moe Nyin kaw na Modo langai hte shamu shamwt pru wa ai Myen Hpyen Dap ni hte KIA Hpyen Hpung ni Nam Ma makau kaw Gasat Poi byin ai lam nga ai sha n-ga Si Sak hte Pang Hkawn Yang lapran kaw mung Hk.M.Y (385) ni hte KIA Masat (5) Dap Dung kata na hpyen hpung ni gasat poi byin ai lam na chye lu ai.

April (19) ya shana hkying (6:30) aten daram hta Mung Sadung Bum kaw dap jung nga ai A.M.T (365) Dap ni kawn KIA Masat (5) Dap Ba, Masat (3) Dap Dung Ginra maga de laknak kaba gap bang ai lam nga ai re hpe na chye lu ai.

Jinghpaw Mung Ginra, Lahta Sammung Ginra shara nkau ni hta ndai laman KIA Hpyen Hpung ni hte Myen Hpyen Dap ni Gasat Poi lani hte lani grau nna laja lana byin wa ai lam nga ai hta maga mi de gaw Myo Mare kaba shara shagu ngu na Mungshawa ni mung Hpyen Gumshem hpe nra sharawng ninghkap n-gun madun ai lamang ni mung matut manoi naw galaw ai lam nga ai re.

Leave a Reply

*

This site uses Akismet to reduce spam. Learn how your comment data is processed.