KIA hte Myen Hpyen Dap ni Gasat Poi Matut Manoi byin

KIA Masat (9) Dap Ba Ginra hte KIA Masat (5) Dap Ba Ginra ni hta April (19) ya shani KIA hte Myen Hpyen Dap ni Gasat Poi matut manoi byin ai lam nga ai.

KIA Masat (9) Dap Ba, Masat (6) Dap Dung Ginra, Tang Gau Bum, Masa Tu Kawng ni hta April (18) ya shana (8:00) aten daram kaw nna KIA hte Myen Hpyen Dap ni Gasat Poi byin ai lam nga ai rai nna April (19) ya jahpawt hta mung Gasat Poi naw matut byin ai lam na chye lu ai.

KIA Hpyen Hpung ni hte Gasat Poi byin ai shara ni hta Myen Hpyen Dap kawn Jet Nbung Li lahkawng hte bawm wa jahkrat bun ai lam, jak sinat ni hte wa gap ai lam ni mung nga ai re hpe na chye lu ai.

KIA Masat (5) Dap Ba Masat (3) Dap Dung Ginra, Sadung Ginwang kata Lagat Kawng kaw mung April (19) ya shani hkying (11:00) aten daram hta mung Myen Hpyen Dap hte KIA Hpyen Hpung ni Gasat Poi byin ai lam nga ai re.

KIA Masat (8) Dap Ba Ginra de mung April (18) ya shani hte April (19) ya shani hta Myen Hpyen Dap Kawn Jet Nbung Li hte bawm wa jahkrat ai lam nga ai re majaw lahkawng maga na Hpyen masa naw maja hkat nga ai masa re nga nna shawng lam na lit nga ai salang langai tsun ai.

Jinghpaw Mung Ginra hta lai wa sai bat kaw na KIA hte Myen Hpyen Dap ni shani shagu ngu na gasat poi byin nga ai hta Myen Hpyen Dap kawn Jet Nbung Li ni jai lang nna bawm wa jahkrat ai lam, Laknak kaba ni gap shadam ai lam ni mung ding yang galaw nga ai hta Manmaw, N-mawk Ginra na Mungshawa Hkying Lahkawng daram gaw ya aten hprawng yen mat ai lam nga sai re.

Leave a Reply

*

This site uses Akismet to reduce spam. Learn how your comment data is processed.