Mungmyit Sinli Ga Ginra ni hta KIA hte Myen Hpyen Dap ni Gasat Poi Matut Manoi Byin nga

Mungmyit Sinli Ga, Kachin Sub-state Ginra kata hta Myen Hpyen Dap ni kawn KIA ni nga ai shara de Hpyen n-gun jat bang nna htu shadut shamu shamawt ai lam ni ding yang naw galaw nga ai majaw KIA hte Myen Hpyen Dap ni Gasat Poi matut manoi naw byin nga ai lam na chye lu ai.

April (15) ya shani hta mung KIA Masat Masat (4) Dap Ba, Masat (34) Dap Dung Ginra, Nam Lam Zup makau kaw Man Dung kawn shamu shamawt pru wa ai Myen Hpyen Dap Hk.L.Y (251) ni hte KIA Hpyen Hpung ni gasat poi byin ai lam na chye lu ai.

Dai shani hta sha KIA Hpyen Hpung ni nga ai shara de htu shadut shamu shamawt lung wa ai Myen Hpyen Dap Hk.L.Y (251) Dap kata na hpyen hpung ni hte KIA ni Nam Palang hte Man Dung lapran kaw mung num daw kalang mi bai gasat poi byin ai lam nga ai re hpe chye lu ai.

KIA Masat (3) Dap Ba, Masat (15) Dap Dung Ginra hta mung Manmaw Maga na Hpyen Modo ni hte rau shamu shamawt lung wa ai Myen HPyen Dap ni hpe April (15) Ya shana daw hta KIA ni Nawng Laik Mare makau kaw hkap shing la gap gasat ai lam nga ai re hpe na chye lu ai.

April (15) ya shani hta gaw KIA Masat (3) Dap Ba Ginra, KIA Masat (4) Dap Ba Ginra, KIA Masat (2) Dap Ba, Masat (14) Dap Dung Ginra ni hta shara 4 kaw KIA hte Myen Hpyen Dap gasat poi byin ai lam nga ai re hte KIA Masat (2) Dap Ba Ginra hta gaw Myen Hpyen Dap kawn Jet Nbung Li 2 hte bawm (5) lang wa jahkrat bun nna sinat ni hte mung wa gap gasat ai lam nga ai re hpe na chye lu ai.

 

Leave a Reply

*

This site uses Akismet to reduce spam. Learn how your comment data is processed.