Nam Jim Mare Kaw Bawm Kapaw Ai Lam byin ai majaw Myen Hpyen Dap kawn Mungmasha ni hpe laja lana san jep

Myitkyina ginra, Nam Jim mare Hpunggyi Jawng makau na Hkau na pa kaw April (8) ya jahpawt (7:00) aten daram hta bawm lahkawng lang kapaw ai lam nga ai majaw Myen Hpyen Dap kawn Mungshawa ni hpe laja lana san jep ai lam nga ai re hpe na chye lu ai.

Myen Hpyen la ni kawn mare makau mayan hkan sinat hte gap dum bre ai lam galaw ai nna dai shara hte kade n tsan ai dum n ta kaw nga ai mare masha langai hpe mung laja lana sinat hte adup abyen nna san jep ai lam galaw ai lam chye lu ai.

“Nam Jim shang ai deng galu hpunggyi jawng makau na hkauna pa kaw n dai zawn bawm kapaw ngut ai hpang Myen Hpyen La ni kaw sinat ni mung jahpawt tup gap sharu ai dai makau kaw nga ai Lisu hkanla lahkawng a n-ta wang de shang wa nna sinat ni hte adup abyen na n dai kaw kadai ni bawm sa kapaw ai nchye dat ai i? n mu dat ai i? nga nna san jep ai lam galaw ai re. masha chyawm rim woi mat ai lam n galaw ma ai”nga nna mung ginra masha langai tsun ai.

Nam Jim mare kata shang wa, pru wa ai Mungmasha ni hpe shani ka-ang a ten daram du hkra Myen Hpyen gumshem ni kawn jahkring nna laja lana sawk jep, san jep ai re hpe mung na chye lu ai.

Leave a Reply

*

This site uses Akismet to reduce spam. Learn how your comment data is processed.