KIA Masat (4) Dap Ba Ginra Shara Lahkawng hta KIA hte Myen Hpyen Dap ni Gasat Poi byin

Mungmyit Sinli Ga, Kachin Sub-state, KIA Masat (4) Dap Ba Ginra hta April (7) ya shani KIA hte Myen Hpyen Dap ni shara (2) kaw Gasat Poi byin ai lam na chye lu ai.

Kutkai kawn yu wa ai Myen Hpyen Dap Hpyen n-gun (30) daram gaw Modo (4) hte  KIA ni nga ai shara de shamu shamawt shang wa ai majaw Man Ping mare baw kaw KIA Masat (39) Dap Nawng Dap Dung ni hkap shingla gap gasat ai kawn gasat poi byin wa ai lam chye lu ai.

KIA Masat (8) Dap Dung Ginra Mung Yu hte Lun Gan lapran kaw mung dai shani shani hkying (1:30) aten daram hta Myen Hpyen Dap Hk.M.Y (427) kata na Hpyen Hpung ni lagaw lam hte KIA ni nga ai shara de htu shadut lung wa ai majaw KIA Masat (8) Dap Dung kata na Hpyen Hpung ni hkap shing la gap gasat ai kawn gasat poi byin wa ai lam shawng lam na Lit nga ai salang langai tsun ai.

“Mung Yu hte Dum Gan lapran kaw re gasat poi gaw, anhte ni nga ai de shanhte gaw htu lung wa ai rai nga, dai kaw anhte hkap gap na gasat poi byin wa ga re”

April (6) ya shani hta mung KIA Masat (4) Dap Ba, Masat (8) Dap Dung Ginra, Nahpaka Ginwang, Na Kawng Mare lahta kaw KIA hte Myen Hpyen Dap ni Gasat Poi byin lai wa sai re hpe na chye lu ai.

 

Leave a Reply

*

This site uses Akismet to reduce spam. Learn how your comment data is processed.