Mungmyit Sinli Ga Ginra Kaw Gasat Poi Matut Manoi Byin

Mungmyit Sinli Ga, Kachin Sub-state, KIA Masat (6) Dap Ba hte KIA Masat (4) Dap Ba Ginra shara (2) hta April (6) ya shani gasat poi byin ai lam na chye lu ai.

KIA Masat (4) Dap Ba, Masat (8) Dap Dung Ginra, Nahpaka Ginwang, Na Kawng Mare lahta kaw Myen Hpyen Dap ni Hpyen shamu shamawt lung wa ai hta KIA Hpyen Hpung ni hkap shing la gap gasat ai kawn gasat poi byin wa ai re lam na chye lu ai.

KIA Masat (6) Dap Ba, Masat (36) Dap Dung Ginra, Man Yang hte Bang Mwi lapran kaw mung dai shana hkying (5:10) aten daram hta KIA hte Myen Hpyen Dap ni gasat poi byin ai lam chye lu ai.

N-dai Gasat Poi mung Myen HPyen Dap ni Hpyen n-gun (60) daram gaw Hpawng Seng maga na lagaw lam hkawm let KIA Masat (36) Dap Dung Ginra de shamu shamawt lung wa ai hta KIA Masat (36) Dap Dung kata na Hpyen Hpung ni hkap shingla gap gasat ai kawn gasat poi byin wa ai re lam matut na chye lu ai.

Mungmyit Sinli Ga Ginra hta n-dai laman Myen Hpyen Dap ni Hpyen shamu shamawt ding yang rai nga ai majaw gasat poi ni matut nna naw byin wa mai ai ng anna mung shawng lam na lit nga ai salang ni tsun maram nga ma ai re.

Jinghpaw Mung, Lahta Sammung ginra shara law law hta KIA hte Myen Hpyen Dap ni n-dai laman gasat poi shani shagu ngu na daram byin ai lam nga ai re hte maga mi de gaw Myen Hpyen gumshem hpe nra sharawng ai Mungshawa ni mung n-gun madun ai lam matut manoi galaw nga ai re hpe mung chye lu ai.

Leave a Reply

*

This site uses Akismet to reduce spam. Learn how your comment data is processed.