Namti Mare Makau Kaw KIA hte Myen Hpyen Dap ni Gasat Poi Byin

KIA Masat (11) Dap Dung Ginra, Namti Mare, Chyauk Tawng kaw KIA hte Myen Hpyen Dap ni April (3) Ya shani Hkying (10:30) aten daram hta gasat poi byin ai lam na chye lu ai.

Myitkyina Ginra Maga de na Hpyen Modo (4) hte Danai Lido Lam Maga de Hpyen Garum lung wa ai Myen HPyen Dap ni gaw Hpyen n-gun jat na matu shamu shamawt lung wa ai majaw KIA Masat (11) Dap Dung kata na Hpyen Hpung ni hkap shingla gap gasat ai kawn gasat poi byin wa ai re lam na chye lu ai.

“Gasat Poi gaw grai na hkra byin ai gaw nre Myitkyina de na yu wa ai Hpyen Modo hpe Dung 11 ni hkap gap gasat ai re lam chye lu ai. Namti kaw na pru wa yang Chyauk Tawng nga kaw re Myen gaw gara dap ni re tup gaw n chye ai” nga nna ginra masha langai tsun ai.

Ya aten Jinghpaw Mung Ginra de malu masha, jak sau, laknak hte Hpyen Garum lung wa ai Hpyen Modo (40) mung Lawu Ga de na Jinghpaw Mung de lung wa ai lam nga ai re hpe mung na chye lu ai.

KIA Masat (9) Dap Ba, Masat (6) Dap Dung Ginra, Ginsi Mare kaw Dap Jung nga ai Myen HPyen Dap ni mung April (3) ya shani Hkying (10:15) Aten daram hta KIA ni nga ai shara de Sinat laknak kaba (2) Lang Gap bang ai lam nga ai re hpe mung na chye lu ai.

Leave a Reply

*

This site uses Akismet to reduce spam. Learn how your comment data is processed.