Lido Lam Mayan kaw KIA hte Myen Hpyen Dap ni Gasat Poi Byin

KIA Masat (2) Dap Ba, Masat (11) Dap Dung Ginra, Sinna Ginwang Ginjaw, Myitkyina Ginwang, Danai Lido Lam mayan Dumbang Mare hte Loi Li Yang Hka lapran kaw April (1) ya shani Hkying (11:00) aten daram hta KIA hte Myen Hpyen Dap ni gasat poi byin ai lam na chye lu ai.

Myen Hpyen Dap ni kawn KIA ni nga ai shara de htu shadut shamu shamawt hkawm ai lam nga ai majaw KIA Hpyen Hpung ni kawn Hkap Shingla Gap Gasat ai kawn Gasat Poi Byin wa ai re lam dai ginra na mungmasha langai tsun ai.

“Ya ten na shamu shamawt masa gaw Hpyen manam gaw grai wa shamu shamawt ai nmu ai. Na ai daram nga yang gaw Myen Hpyen Dap ni Danai maga na shamu shamawt yu wa ai kaw KIA ni sin nga ai shara de pru wa na gap hkat ai re nga ai”

March (31) ya shani hta mung Masat (1) Dap Ba, Masat (7) Dap Dung Ginra, Putao Ginwang, Sum Pyi Yang Mare hte Shing Kap Bum lapran Gagam Hka grup yin shamu shamawt hkawm ai Myen Hpyen Dap Hk.L.Y (138) hte KIA ni Gasat Poi byin ai hte Dap Ba (8) Ginra, Chyauk Gyi kaw nga ai Myen Hpyen Dap hte KIA Masat (5) kata na Hpyen Hpung ni mung Gasat Poi byin ai lam na chye lu ai.

KIA Masat (8) Dap Ba, Masat (5) Dap Dung Ginra kaw mung Myen Hpyen Dap Jet Nbungli (2) hte March.31 ya shana de hkying (3:00) aten daram hta bawm wa gap jahkrat ai sha n-ga Ginjaw Ginra, Shang Hkawng Bum hte Nhkram Bum kaw Dap Jung nga ai Myen Hpyen Dap Hk.L.Y (56) ni mung grup gra de 81 MM gap bang ai lam, Maji Gung Kaba kaw nga ai Myen Hpyen Dap ni mung Law Hkum hte Gat Rawn grup yin de 105 MM (2) lang gap bang ai lam na chye lu ai.