Laiza Muklum Alen Bum kaw Wunpawng Mungdan Shanglawt Asuya Ginjaw Hkai Rem Magam Dap kaw nna Hpaw Sharin ya nga ai Masat Yan (7) Lahta Tsang Hkai Rem( Diploma) hte Masat Yan (18) Ningpawt Ninghpang Hkai Rem Jawng Yu Hpawng hpe March (31) ya shani Hkai Rem Magam Dap Hkru Kat Gawk Nu Kaw galaw ai lam chye lu ai.
Hpawng hta Wunpawng Mungdan Shanglawt Kongsi (KIC) Ningbaw Malai Du Kaba Sumlut Gun Maw kaw nna mung Hpaji Jaw Shatsam Mungga jaw ya ai lam nga ai re.
“Anhte a myu sha ni Rawt Malan nga ai ten hkru kat ra ai, Hkai Sun chye galaw sha ra ai, Tinang lagaw tinang tsap lu hkra shakut ra ai lam”
Jawng Yu sai jawng ma ni hpe Hkai Rem Jawng Up Sr.kaba Kareng Brang Seng kaw nna mung Jawng Yu Mungga shaga ya ai lam nga ai re.
Jawng Yu lekmat shagrau hkam la sai Jawng Ma ni gaw Hkai Rem Lahta Tsang ( Diploma) Jawng Yu ai marai (11) hte Ningpawt Ninghpang Hkai Rem Jawng Yu ai Marai (10) rai yang yawng marai (21) tup re lam chye lu ai.
Hkai Rem Jawng hpe June shata kaw nna March shata du hkra shata (10) tup sharin ya ai rai nna, Hkai Rem Hpaji Hpan (10) , Madi Shadaw Ga Hpan (4) , Ninggawn Mungmasa hte Rawt Malan Labau ni hpe mung sharin ya ai re lam chye lu ai.
Hkai Rem Jawng hpe Lai wa sai 1997 Ning Mai Ja Yang Wun Gau Bum kaw Hpaw Sharin Hpang ai rai nna dai ni du hkra rai yang hkai Rem Jawng yu sai Jawng Ma marai (335) du sai re lam chye lu ai.