KIA Masat (9) Dap Ba, Masat (44) Dap Dung Ginra, Nam Ya Mare hte Kamaing Mare kaw shara jahkrat nga ai Myen Hpyen Dap ni kawn March (30) ya shani HKying (10:00) aten laman makau grup yin de sinat laknak kaba ni gap shadam ai lam na chye lu ai.
KIA hte Myen HPyen Dap kawn dai shara hta gasat poi byin ai lam nnga ai raitim ya na zawn Myen HPyen Dap kawn masat nnga ai sha laknak hpe majoi gap shadam ai majaw Nam Ya Mare, Kap Maw Mare, Senghpra Mare, Sawng Hka hte Ga Matep makau grup yin hkan shanu nga ai Mungshawa ni hkrit tsang nga ma ai lam na chye lu ai.
March (30) ya shana de hkying (1:00) aten daram hta mung Ginjaw Ginra, Hka Ya Bum kaw nga taw ai Myen HPyen Dap ni Alen Bum maga de 120 MM (2) lang gap bang ai lam nga ai re hte Gum Ra Dabang kaw nga taw ai Myen HPyen Dap Hk.L.Y (56) ni mung Grup Gra de 81 MM (2) lang gap bang ai lam nga ai re hpe na chye lu ai.
Lahta Sammung Mungmyit Sinli Ga ginra hta Myen HPyen Dap hte KIA ni lai wa sai Febuary kawn hpang n-htawm gasat poi ni bai byin hpang wa ai rai nna Jinghpaw Mung Ginra hta gaw March.11 ya shani kaw nna gasat poi byin wa ai re hte March.31 ya shani du hkra rai yang KIA hte Myen HPyen Dap ni gasat poi (20) lang daram byin ai lam nga sai re hpe chye lu ai.