Myen hpyen Dap Ni Kawn Mungmasha ni a Hkauna Lamu Ga Zing Madu Wa

Man Maw Ginwang , Man Je Ninghtawn kata na Mungmare Masha ni a Lamu Ga Eka (610) hpe daining na ladaw hta hkauna tsep kawp nmai galaw sha na lam myen hpyen Dap kaw nna tsun sadi jaw wa ai re lam na chye lu ai.

“Man Je Ninghtawn Ga Ra Yang Mare kaw  Dap Jung nga ai  Hk.M.Y (601) na Myen HPyen Du Langai gaw Man Je na Salang ni hpe shaga la n-htawm dai ning gaw hkau na de tsep kawp nsa galaw matu tsun sadi jaw ai lam ni nga ai” nga nna Man Je Mare na Mare Masha langai tsun ai.

Ga Ra Yang mare kaw dap jung nga ai  Hk.M.Y. (601) hte (301) kata na Myen Hpyen Du ni hte  Seng Ang ai Mare Up HKang Salang ni gaw  Mungmasha Htinggaw  (15)  hpe seng ang ai rung de shaga la nna  mungshawa ni hkau na galaw sha ai shara hta Hpyen Dap Wang Masat  na re majaw  Mam dan la ngut jang tsep kawp  nmai galaw sha sai lam, Mungshawa ni a hkauna hpe ja gumhpraw manu jahpu jaw nna  mari la ai hku nre sha Hpyen Dap Gaiwang shatai na matu myit hkrum ta masat htu shangun ai lam hpe lai wa sai 2020 shaning October shata (26) ya shani hta galaw shangun ai re lam mare masha ni tsun ai kaw na chye lu ai.

Myen Hpyen Dap ni kawn Mungmare masha ni a hkauna lamu ga ni hpe tsep kawp n galaw sha lu na lam tsun ai gaw lai wa sai shaning kaw nna lang hte lang tsun ai rai nna Hpyen Dap Shara Masat la kau hkrum ai Mngmasha Htingaw (15) kaw nna mung lamu ga hpe tsep kawp nlu jaw ai majaw ya aten du hkra ta masat garai n htu shi ai lam matut na chye lu ai.

Myen Hpyen Dap ni kawn tsep Kawp nmai galaw sha sai lam tsun shana da ai hkau na ni gaw Man Je Ninghtawn kata na Ga Ra Yang Mare , Nam Mahpoi mare hte  Myitung Kahtawng na mungmasha htinggaw (15) a hkauna lamu ga re lam chye lu ai.