Myen HPyen Dap Kawn Sinat Laknak Kaji Kaba Ni Gap Shadam

Sinlum Bum hte Yaw Yung Bum kaw Dap Jung shara Jahkrat nga ai Myen Hpyen Dap ni March (28) ya shana Hkying 8:00 hte Hkying 10:30 aten laman KIA Hpyen HPung ni nga ai shara de Sinat Laknak Kaji Kaba gap bang ai lam na chye lu ai.

Yaw Yung Bum kaw Dap Jung Shara Jahkrat nga ai Myen Hpyen Dap ni KIA Masat (3) Dap Ba, Masat (15) Dap Dung Ginra hte Masat (21) Dap Dung Ginra kata de 120 MM Laknak kaba ni (34) Lang Gap Bang ai lam nga ai sha n-ga Sinlum Bum kaw nga ai Myen Hpyen Dap ni mung laknak kaba (7) lang gap bang ai re hte Hkring Mu Dan Post kaw nga ai Myen Hpyen Dap ni mung shana hkying 8:30 kaw na hkying 9:00 du hkra sinat kaji ni hte gap shadam ai lam na chye lu ai.

Sinlum Bum kaw nga ai Myen Hpyen Dap ni gaw lai wa sai March (25) ya shana hta mung Sinat Laknak Kaji Kaba ni gap ai lam nga ai majaw Sinlum Mare hte makau grup yin mare kahtawng hkan nga ai mungmare masha ni gaw hkrit tsang nna ya aten Manmaw, N-mawk, Loi Je, Nhkawng Pa, Pa Kahtawng hpyen yen dabang ni de hprawng yen nga ma ai lam na chye lu ai.

Masat (6) Dap Dung ginra, Gin Si mare makau kaw nga ai Myen Hpyen Dap Hk.L.Y (76) ni mung March.28 ya jahpawt hkying 3:40 aten Taw Maw maga de 120 MM (21) lang gap bang ai lam nga ai re hte Myitkyina Muklum kata kaw Mung dai shana de Hkying 12:42 aten bawm langai kapaw ai lam nga ai re hpe mung na chye lu ai.