KIO uphkang ginra na hpaji jawng ni hpaw sharin nga

KIO uphkang ginra Laiza Muklum kata na hpaji jawng ni hpe Covid-19 ana zinli makawp maga lam ni hte hkrak rai nna hpaw sharin nga sai lam chye lu ai. July 20 ya shani kaw nna lahta tsang jawng tsang 10 shawng hpaw sharin nna ya aten lawu tsang hte lahta tsang jawng yawng hpaw sharin nga sai re.

Jawngma ni hpe hkamja lam jep chyoi ya ai lam, jawng gawk kata n-gup magap shakap ai lam, lata kashin shangun ai lam ni hpe mung sara/saranum ni kaw nna woi awn galaw nga ai lam chye lu ai.

“Ana hpe makawp let gaw sharin taw ai rai nga, sara/saranum ni hpe mung atsawm yu shangun ai. Jahpawt shagu hkum gahtet shadang shadawn ya ai, n-gup magap lang shangun ai, ta gashin shangun ai, langai hte langai gang gang nga na matu ayan na matsun taw yu taw ai hku re” nga nna Laiza Lahta Tsang Jawng Up Srn. Kaba Singneng Ja Mai tsun dan ai. Jawng hpaw sharin ten n law ai majaw laika sharin shaman shakyang ai hpe sha madung tawn ai re. Covid-19 ana zinli makawp maga ai lam hta tsang kaba sai ni gaw hkan sa ai lam nga ai raitim tsang kaji pang ma ni gaw grai wa hkan sa lu ai lam n nga shi ai majaw kanu kawa ni kaw nna shanglawm shadum garum ya ra na re lam saranum kaba matut tsun ai.

Ya aten Laiza Lahta Tsang Jawng hta jawngma marai 1050 jan jawng lung nga ai rai nna jawng lung aten hpe bat hpang 1,3,5 hta tsang 10 ni hte lawu tsang ma kaji ni, bat hpang 2,4,6 shani ni hta tsang 9 hte lapran jawngma ni jahpawt hkying 8 kaw nna shana de hkying 1 du hkra sharin hkam la nga ma ai re. Apnawng magam gun ni kaw nna jawng pat ai nhtoi ni hta ana makawp maga tsi gat ai lam, ma ni hpe hkamja lam jep chyoi ya ai lam, hkamja lam hte seng nna ningmu jahpaw ai lam ni galaw nga dingyang re lam mung chye lu ai.