Mai Ja Yang Muklum hte Sinlum Bum Ginwang hpaw hpawng galaw

Wunpawng Mungdan Shanglawt Asuya, Mungchying Uphkang Dap, Sinpraw Ginwang Ginjaw npu na Mai Ja Yang Gaiwang hpe Mai Ja Yang Muklum de madang shatsaw masat ai akyu hpyi hpawng hte Sinlum Bum Ginwang nnan hpaw hpawng lamang hpe July 30 ya shani Sinpraw Ginwang Ginjaw, Wun Gau Bum, Htoi Gintawng Gawknu kaw galaw ai lam na chye lu ai.

Hpawng lamang hta muklum nnan hte ginwang nnan masat ai matsun laika hti ai lam, Mungchying Uphkang Dap Lithkam Slgkb. Labya Tang Gun kaw nna mungga jaw ai lam, Ginwang Ginjaw Uphkang Du Slgkb. Maji Naw Mai kaw nna muklum ningnan hte ginwang ningnan hpe amyusha dawnghkawn hte ntawng nhtu majai ap ya ai lam ni galaw lai wa sai.

Laksan Mai Ja Yang Gaiwang hpe lai wa sai June shata 11 ya shani kaw nna gaiwang madang hpe dawm kau nhtawm muklum madang de shatsaw dat ai rai nna, Sinlum Bum Ginwang hpe gaw Wunpawng Mungdan Shanglawt Kongsi kaw nna nnan hpaw masat dat ai re hpe chye lu ai.